“Flamenqo”nun hücumçusu Juninyo Olavionun “Qarabağ”a dönüşü böyük ehtimalla baş tutmayacaq.

Prosport.Az Braziliya mətbuatına istinadən xəbər verir ki, 29 yaşlı futbolçu ölkəsində qalmağı planlaşdırır – lakin klubunu dəyişmək şərti ilə.

Belə ki, Juninyo onun üçün klubuna rəsmi təklif göndərən “Bahia”ya keçməyə razılıq verib. İndi qalır klubların ortaq məxrəcə gəlməsi. “Flamenqo” oyunçusunu “Qarabağ”dan aldığı məbləğə – 5 milyon avroya satmağa razıdırsa, “Bahia” məbləğdə endirimə getməyə çalışır. Çünki Juninyo hazırkı komandasında əsas heyət üzvü deyil.

“Qarabağ” isə sabiq forvardını icarəyə götürmək niyyətindədir. Lakin “Flamenqo” Juninyonu birdəfəlik satmağı üstün tutur.

Qeyd edək ki, “Flamenqo”ya bu ilin əvvəlində “Qarabağ”dan keçən Juninyo Braziliya klubunun heyətində 32 oyunda 4 qol vurub.