Misli Premyer Liqasının XIV turunun “Karvan-Yevlax” – “Şamaxı” oyunundan (0:3) sonra qonaq komandanın məşqçisi Elnur Çodarov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib…

– Gözlədiyimiz kimi maraqlı, gərgin, yaxşı oyun alındı. Birinci hissə daha çox keyfiyyət xarakteri daşıyırdı. Füzuli Məmmədovu yeni təyin ediblər. 2 oyunlarına baxmışdıq, analiz etmişdik. “Qarabağ”a qarşı tam fərqli idi, bizə qarşı tam fərqli. Bilirdik ki, belə də olacaq. 2-ci hissə sürəti artırdıq, daha çox irəlidə aqressivliyi, intensivliyi artırdıq, istədiyimizə nail olduq. Debüt edən oyunçumuz oldu. Onu da təbrik edirik. Bir şeyi də qeyd edim ki, matçın sonlarında meydançada 6 yerli oyunçumuz var idi.

– Ayxan Abbasovla mütəmadi əlaqədə idiniz? Əsas göstərişi nədən ibarət idi?

– Birinci hissə kəşfiyyat xarakteri daşıyırdı. Çünki rəqibin baş məşqçisi yeni idi. Gözləyirdik, tələsmirdik. Futbolçulara tapşırmışdıq ki, tələsməsinlər, rəqibi gözləsinlər və kompakt oynasınlar. Öz epizodumuzu gözləyirdik. 2-ci hissədə futbolçular tapşırıqları maksimum şəkildə yerinə yetirməyə çalışdılar. Qolumuzu vurduq və ardını da gətirdik.

– Dieqo Balaunun vurduğu qollardan biri “ayın qolu” nominasiyasında qalib olub. Bu dəfə də vurduğu qol baxımlı alındı. Deyəsən, artıq yenə də bu mükafatı qazanmaq istəyir..

– Ümid edək ki, qalib seçilər (gülür). 2-ci qolu da elə birinci qoluna bənzəyirdi.

– Süni örtüklü meydançada oynadınız. Yevlax stadionunu ot örtüyü necə idi?

– Meydança da ağır idi. Dəqiq desək, süni örtüyün rezinləri sərt idi. Yağış üzümüzə baxdı.