UEFA Çempionlar Liqasının VI turunda Bakıda "Qarabağ" və "Ayaks" (Niderland) komandaları arasında keçiriləcək oyunu yayımlayacaq telekanal dəyişib.

Prosport.Az xəbər verir ki, görüş əvvəldən nəzərdə tutulduğu kimi "CBC Sport" deyil, İctimai Televiziyanın canlı efirində olacaq.

Bu barədə İTV-nin sosial şəbəkə hesablarında məlumat paylaşılıb.

"Məlum olduğu kimi, “Saran Media” ilə əldə edilmiş razılaşma əsasında 2025/26 mövsümündə UEFA Çempionlar Liqası, Avropa Liqası və Konfrans Liqasının oyunları İctimai Televiziyanın canlı efirində təqdim olunur. "Qarabağ" klubunun Çempionlar Liqasının əsas mərhələsində keçirdiyi görüşlər də bu razılaşma çərçivəsində İctimai Televiziya tərəfindən yayımlanır. Tərəflər arasında mövcud sıx əməkdaşlıq fonunda aparılan son müzakirələr nəticəsində əvvəlcədən planlaşdırılan yayım proqramında müəyyən dəyişikliklərin edilməsi məqsədəuyğun hesab olunub. Yayımçı qurumların birgə təşəbbüsü ilə “Qarabağ" – “Ayaks” oyununun İctimai Televiziyanın canlı efirində nümayiş etdirilməsi barədə qərar qəbul olunub", - deyə paylaşımda bildirilib.

Qeyd edək ki, dekabrın 10-da Tofiq Bəhramov adına Respublika stadionunda keçiriləcək qarşılaşma saat 21:45-də başlayacaq.