"Neftçi" ilə müqavilə bağlamaq üçün Azərbaycana gələn Yuri Vernidubun korpusu 7 nəfərdən ibarət olacaq.

Prosport.Az sportinfo.az-a istinadən xəbər verir ki, ukraynalı çalışdırıcı özüylə 4 köməkçi gətirməyi lazım bilib.

Onlardan biri 2 il onunla işləmiş oğlu Vitali Vernidubdur. 59 yaşlı baş məşqçinin heyətində 2 yerli də olacaq.

Samir Abasovdan boşalan vəzifəyə əyləşməyə hazırlaşan Y.Vernidub bu gün klub rəhbərliyi ilə geniş toplantı keçirəcək və ümumi məsləhətləşmə əsasında azərbaycanlı yardımçılarının kimliyini müəyyənləşdirəcək.

Tərəflər arasında 1,5 illik müqavilə imzalanacaq. Bu, ümumi anlaşmanın, belə deyək, rəsmi hissəsidir.

Vernidub qarşıdakı zaman kəsiyində uğur əldə etsə, kontraktın müddəti minimum daha 1 il uzadılacaq.

Qarşısına qoyulan məqsəd kifayət qədər ciddi və konkretdir. O, bu mövsüm avrokuboklara vəsiqə uğrunda mübarizə aparmalıdır. Ölkə kuboku ilə vidalaşan "ağ-qaralar"ın qitə arenasına çıxmaq üçün bütün ümidləri Premyer Liqaya qalıb. Burada isə vəziyyət narahatedicidir: komanda 13 turdan sonra turnir cədvəlinin 8-ci pilləsində yer alıb.

Bakılılar cari mövsümün sonunda çempionatın mükafatçılar sırasına düşməsə, Verniduba "gözün üstdə qaşın var" deyilməyəcək. Çünki ondan əsas gözləntilər növbəti "futbol ili" ilə əlaqədardır.