Naxçıvan Futbol Federasiyasının (NFF) prezidenti Zaur Axundov "Araz-Naxçıvan"da toplantı keçirib.

Prosport.Az sportinfo.az-a istinadən xəbər verir ki, iclasda klub funksionerləri və məşqçilər iştirak ediblər. Maraqlıdır ki, Elmar Baxşıyev burada yer almayıb.

Çalışdırıcının iştirakı olmadan baş tutan yığıncaqda komandanın son həftələrdəki çıxışı müzakirəyə çıxarılıb.

NFF-nın birinci şəxsi baş məşqçinin fəaliyyətindən narazılığını bildirib. Kluba heç vaxt olmadığı qədər böyük büdcə ayırdıqlarını, Baxşıyevin ona ciddi vədlər verdiyini, lakin hadisələrin tam əks istiqamətdə davam etdiyini söyləyib. İş adamı qeyd edib ki, Baxşıyev ümidləri doğrultmayıb, yolların ayrılması artıq günün tələbidir.

Axundovun diqqətini çəkən hal komandanın sükançısına münasibətidir. Belə ki, adıçəkilən mütəxəssis əksər futbolçuların gözündən düşüb, sözü çəkisini itirib, verdiyi tapşırıqlara məhəl qoyulmur.

NFF-nin başqanının fikrincə, Baxşıyev geridə qalan 3-4 ay ərzində işinə məsuliyyətlə yanaşmayıb, oyunçular arasında ayrı-seçkilik hallarına yol verib, balans yaratmayıb, bu da nəticələrin pisləşməsinə gətirib çıxarıb.

Muxtar respublika təmsilçisi ölkə kubokunda mübarizəni 1/8 final mərhələsində dayandırıb.

Bu "cəbhə" ilə erkən vidalaşan "ağ-qırmızılar"ın Premyer Liqada işləri də yağ kimi getmir. 13 tura 20 xal toplayan kollektiv turnir cədvəlinin 6-cı pilləsinə yuvarlanıb.