Çempionlar Liqasının VI turunun "Qarabağ" - "Ayaks" matçından öncə UEFA-nın rəsmi saytında hər iki klub üçün bir sıra statistik məqamlar dərc olunub.

Prosport.Az xəbər verir ki, qurumun rəsmi saytında qarşıdan gələn görüşün komandalar arasında 2-ci duel olacağı vurğulanıb: 

"Klublar ötən mövsüm Avropa Liqasının əsas mərhələsində Bakıda bir-biri ilə oynayıblar və Amsterdam komandası 3:0 hesabı ilə qalib gəlib. "Qarabağ" Niderland klublarına qarşı əvvəlki 5 avrokubok oyununda qələbə qazanmayıb (3 heç-heçə, 2 məğlubiyyət)".

UEFA, həmçinin "Ayaks"ın məğlubiyyət seriyasını da qeyd edib: “Onlar son 8 avrokubok matçında uduzublar və bu, klubun tarixində ən uzun məğlubiyyət seriyasıdır".

Qeyd edək ki, "Qarabağ" - "Ayaks" matçı dekabrın 10-da Tofiq Bəhramov adına stadionda keçiriləcək və saat 21:45-də start götürəcək.