Yaydan bəri "Qarabağ"ın transfer siyahısında yer alan seneqallı hücumçu Sambu Sumanonun Fransanın "Loryan" klubunda qalmaq ehtimalı artıb.

Prosport.Az Afrika mətbuatına istinadən xəbər verir ki, klub rəhbərliyi 24 yaşlı futbolçuya müqavilə müddətinin uzadılması üçün rəsmi təklif göndərib. Onun hazırkı müqaviləsi 2026-cı il iyunun 30-da başa çatır.

"Qarabağ"ın transfer etmək istədiyi Sumano hazırda Liqa 1-in ən yaxşı formada olan hücumçularındandır. O, ötən tur "Nitsa" üzərində 3:1 hesablı qələbədə dublla yadda qalıb. Hücumçu cari mövsümdə keçirdiyi 14 matçda 4 qol və 2 məhsuldar ötürmə müəllifi olub.

Xatırladaq ki, yayda "Qarabağ" Sambu Sumanonu heyətinə qatmağa çox yaxın idi. Ağdam təmsilçisi hücumçu üçün 2,5 milyon avro + 500 min avro bonus təklif etmişdi. Hətta tərəflər 3+1 illik müqavilə üzərində razılaşsalar da, transfer son anda baş tutmayıb.

Seneqallı futbolçuyla "Qarabağ"la yanaşı "Sent-Qallen", "Vidzev", "Suonsi", "Seltik" və "Samsunspor" kimi klublar da maraqlanırdı. Transfermarkt onun bazar dəyərini hazırda 4 milyon avro olaraq göstərir.