“Korintians”da əsas komandaya yüksələndə çox utancaq idim. Əgər akademiyada olduğum kimi davransaydım, “Korintians”da özümü doğrulda və Avropanın daha yaxşı klublarına keçə bilərdim”.

Prosport.Az xəbər verir ki, bunu “Neftçi”nin sabiq futbolçusu Bruno Bertuççi ölkəsi Braziliya mətbuatına müsahibəsində deyib.

Keçmiş müdafiəçi söhbət zamanı “Neftçi”də keçirdiyi anları da xatırlayıb. O, xüsusən də, 2012-13 mövsümündə UEFA Avropa Liqasının qrup mərhələsində İtaliyanın “İnter” klubuna qarşı Bakıda keçirilən görüşü xatırlayıb: “Bakıda “İnter”ə 1:3 hesabı ilə uduzduq, amma möhtəşəm oyun keçdi. Karyeramın ən yaxşı matçlarından biri idi. Həmin qarşılaşmadan sonra “İnter”in bir direktoru paltardəyişmə otağına gələrək, mənim əlaqə nömrəmi istədi. Təəssüf ki, italyan pasportum olmadığı üçün keçidim alınmadı. Əgər pasportum olsaydı, hər şey yoluna düşəcəkdi. Bunu həmişə xatırlayıram – “İnter”də oynamaq üçün real imkanım var idi”.

Bertuççi həmin vaxt “Neftçi”də aylıq maaşının 30 min dollar olduğunu söyləyib. 35 yaşlı sabiq futbolçu pulunun qədrini bilmədiyini etiraf edib: “Milyonçu deyildim, amma çox varlanmışdım. Sadəcə, maliyyə savadım yox idi ki, özüm üçün ehtiyat yaradam, bir iş qurum. Karyeramdan sonranı düşünmədim. Qazancımın hamısını xərclədim. Çoxlu daşınmaz əmlaka yatırım etdim. Təkcə Braziliyada 3-4 maşınım var idi. Ölkə xaricində yaşayırdım, amma maşınların orada boş dayanmasına görə pul ödəyirdim. Özümə diqqət yetirmək əvəzinə enerjimi gecə həyatına sərf edirdim. Gecə həyatı məni yoldan çıxardı. Çox yüksək maaş alırdım, bahalı maşın sürürdüm, amma özümü daha yaxşı qorumağım lazım idi. Bu, peşmanlıqlarımdan biridir”.

Qeyd edək ki, 2012-2014-cü illərdə “Neftçi”nin formasını geyinən Bruno Bertuççi dopinqdən istifadəyə görə, 2017-ci ildə – 27 yaşında iki illik diskvalifikasiya olunub və karyerasını bitirib.