"Öncədən də demişdim ki, bu gün oyun çətin olacaq. Eyni rəqibə qarşı ardıcıl 2 dəfə oynamaq asan deyil. Rəqib də, biz də əvvəlki oyundan nəticələr çıxarmışdıq, bəzi düzəlişlər etmişdik. Düzdür, bu gün nə rəqib, nə də biz öz yaxşı oyunumuzu göstərə bildik. Birinci hissə o qədər də yaxşı çıxış etmədik. İkinci hissə rəqibin təhlükəli epizodlar yaratdılar. Yaxşı müdafiə olunduq. Bilirdik ki, ikinci hissədə rəqib irəli atılacaq. Oyunçularımın və ev tapşırıqlarını hazırlayan köməkçimin də haqqını verməliyəm. İkinci hissədə daha açıq oyun oldu. Əks hücumlardan fərqlənərək, oyunu bitirə bilərdik. Təəssüf ki, qol fürsətlərindən yararlana bilmədik. Oyunu əlavə vaxta apardıq. Məni üzən o idi ki, qol fürsətlərindən istifadə edə bilmədik. Kubok oyunudur, penaltilərə qədər gedə bilərdi. Ona görə sonlara yaxın gərginlik var idi. Futbolçularımın haqqını verməliyəm. Bizə dəstək olan azarkeşlərimizə təşəkkür edirəm. Sabah bərpa olunmalıyıq, daha sonra bizi "Neftçi"yə qarşı vacib matç gözləyəcək".
Prosport.Az xəbər verir ki, bu sözləri "Sabah"ın baş məşqçisi Valdas Dambrauskas Azərbaycan Kubokunun 1/8 final mərhələsində "İmişli"yə 2:1 hesabı ilə qalib gəldikləri matçdan sonra keçirilmiş mətbuat konfransında deyib. O, jurnalistlərin suallarını cavablandırıb.
- Qapınıza təyin edilən penaltinin təkrarına baxmısınız? Orada top futbolçunuzun əlinə dəymişdi?
- Siz gördünüz? Mən bu barədə müzakirə aparmaq istəmirəm. Amma içimdən "yanıram". Şərh vermək istəmirəm. Mənim vəzifəm öz futbolçularıma məşq keçməkdir. Onların rəhbərliyinin vəzifəsi də hakimlərə hakimliyi öyrətməkdir. Mənim üçün bu məsələ bağlıdır. Bizim lehimizə penalti verə bilərdilər. Hakimlər fərqli qərarlar verdilər. VAR-da nəyisə tapdılar, gördülər. Özümüzdə güc tapıb, hesabda önə çıxdıq. Öz işimizə köklənmişik.
- "Sabah"ın finala çıxmaq, kubokun qalibi olmaq şansını necə dəyərləndirirsiniz?
- Bu, yeni mövsümdür. Klubun yeni baş məşqçisi var. Bir faiz belə, kubokda gələcəkdə nələrin olacağını fikirləşmirəm. İndi qarşıdan gələn "Neftçi" oyununu, ondan sonra "Turan Tovuz" matçını düşünürəm. Məni daha çox qarşıdan gələn görüşlər maraqlandırır. Sabahkı məşq bu dəqiqə mənim üçün daha önəmlidir. "Neftçi"yə qarşı ağır oyun olacaq.
- "Sabah" "Neftçi" ilə oynayacaq. Siz kubok matçını onlardan bir gün sonra keçirmisiniz. Bu məqam rəqibə üstünlük verə bilər?
- Mən bunu dəyişə bilərəm? Xeyr. Mən daha çox öz nəzarətim altında olanları dəyişmək istəyərdim. Vəzifəm uşaqları oyuna daha yaxşı adaptasiya etməkdir.