“Neftçi”nin hücumçusu Vensan Abubakarın Afrika Millətlər Kuboku üçün Kamerun millisinə çağırılmamasının səbəbi müəyyənləşib.

Prosport.Az yerli mətbuata istinadən xəbər verir ki, Afrika komandasında baş məşqçi dəyişikliyi ulduz futbolçunun önündə maneə olub.

Belə ki, əvvəlki çalışdırıcı Mark Bris 33 yaşlı forvarda dəvət göndərməyi planlaşdırırmış. Lakin bu həftənin əvvəlində Kamerun Futbol Federasiyasının prezidenti Samuel Eto onu istefaya göndərib. Komandanın DÇ-2026-ya vəsiqə qazanmaması çoxdandır Brislə yola getməyən Eto üçün göydəndüşmə olub və baş məşqçi vəzifəsindən uzaqlaşdırılıb.

Baş məşqçi postuna gətirilən David Paqu isə radikal addımlar atıb. O, Abubakarla yanaşı, “Trabzonspor”un qapıçısı Andre Onananı da yığmaya çağırmamağı üstün tutub.

Qeyd edək ki, Afrika Millətlər Kuboku dekabrın 21-dən yanvarın 18-dək Mərakeşdə təşkil olunacaq.