Misli Premyer Liqasının XIII turunun “Turan Tovuz” – “Neftçi” oyunundan (0:0) sonra qonaq komandanın baş məşqçisi Sənan Qurbanov jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.
– Tovuz səfəri çox çətin keçir. Rəqib iddialı klubdur. Turnir cədvəlində olduqları yer də bunu göstərir. Qısa vaxtda çalışdıq ki, komandanı onlara qarşı hazır edək. “Turan Tovuz” mübarizəli oyunu sevir. Belə olacağını da bilirdik. 2 gün məşq edə bildik. Futbolçular həm müdafiədə, həm hücumda nələrsə etməyə çalışdı. Bura qələbə üçün gəlmişdik. Ad “Neftçi”dirsə, prioritet 3 xaldır. Komanda işinə belə ciddi yanaşsa, uğurlar uzaqda deyi.
– Bu gün qələbə olsaydı, komandanın baş məşqçisi olmaq üçün vizit kartınız olardı?
– Hazırda akademiyanın koordinatoruyam. Həm orada, həm də əsas komandada məşq keçmək fəxrdir. Qərarı rəhbərlik verir. “Neftçi”yə faydalı ola bilərəmsə, nə yaxşı.
– Komandada qısa müddətdə nəyi dəyişə bildiniz, nəyi yox?
– Müdafiədə daha ciddi oynamağa çalışırdıq. Samir Abasov yaxşı komanda qurub. Bu kollektiv daha yaxşı yerlərdə olmağa layiqdir.
– Bugünkü nəticəni qənaətbəxş hesab edirsiniz?
– Turnir cədvəlində vəziyyət elədir ki, qələbə komandanı irəli pillələrə apara bilər. Gələcəyə ümidlə baxmaq lazımdır. Qarşıda çətin rəqiblər var. Mübarizənin keyfiyyəti daha da artsa, yaxşı olacaq.
– Özünüzü oyuna necə hazırladınız?
– Burada acı məğlubiyyətdən sonra işimdən ayrılmışdım. Tovuz səfəri çətin olur. Burada həm özümü, həm komandamı hazırlamağa çalışdım. Məğlub olmamaq və qələbə üçün özümüzü hazırladıq. Soyuq başla oyunu yenidən təhlil edəcəyik. Düşünürəm ki, komanda pis çıxış etmədi.
– Qısa müddətdə olsa da, Vensan Abubakara məşq keçdiniz…
– Abubakar peşəkar oyunçudur. İşinə ciddi yanaşır. Özüylə son gündə də danışdım, dedim işinə belə yanaşmağın, ürəklə çalışmağın gənclərə nümunədir. Çox intizamlı biridir. Belə karyeranın sahibi belə yol keçməlidir. Abubakar “Neftçi” üçün böyük qazancdır.
– Abasov son müsahibəsində demişdi ki, Premyer Liqada davamlı olmaq üçün adamın olmalıdır…
– Samir Abasov komandanı çempion edib. Ona adam lazım deyil, özünü sübut edib. Məşqçini önə gətirən qazandıqlarıdır.
– “Neftçi”nin tam hədəfinin ölkə kubokunu qazanmaq olduğunu demək olar?
– “Neftçi” hər yarışda çempionluq üçün mübarizə aparır. Heyətimizdə titulları olan futbolçular var. Kuboku iki dəfə qazanmışam. Qarşıda “Zirə” ilə çətin matç gözləyir. Sabahdan hazırlaşacağıq.
– Gənc futbolçulara şans verməməyinizə nə mane oldu?
– Qısa zamanda qlobal dəyişikliklər etmək düzgün olmaz. Komandanı anidən stressə sala bilmərəm. Rza, Ağadadaş, Murad perspektivli oyunçulardır. Onlar yetərincə şans qazanırlar. Bu futbolçular meydana çıxıb, komandaya kömək edə biləcək futbolçulardır.
– “Zirə” ilə oyuna komandanı siz çıxaracaqsınız?
– Bilmirəm. Onsuz akademiyada işləyirəm. Nə desələr, etməyə hazıram. “Neftçi”də olmaqdan qürur duyuram.
– Sizinlə müqavilə imzalamağa nə mane olur?
– Bilmirəm nə cavab verim. “Neftçi”də daim uğur qazanmalısan. Qorxmuram, çəkinmirəm. Təklif olsa, məmnuniyyətlə qəbul edərəm. İşi sevirəm və bundan zövq alıram. “Neftçi” bütün şəraiti yaradıb. Təklif olsa, qorxmadan öhdəsindən gəlmək olar.