"Kəpəz" Misli Premyer Liqasının XIII turunda Yevlax şəhər stadionunda "Zirə"yə 0:2 hesabı ilə uduzub.

Prosport.Az xəbər verir ki, Gəncə təmsilçisinin baş məşqçisi Azər Bağırov matçdan sonra keçirilən mətbuat konfransında jurnalistlərin suallarını cavablandırıb.

- Mənim üçün çox maraqlı oyun oldu. Meydanda yaxşı mübarizə getdi. Birinci hissədə meydanda 7 yerli futbolçumuz var idi. Bu, onların inkişafı üçün çox yaxşıdır. 2-ci hissədəki xırda səhvlərə görə uduzduq. Həmişə deyirəm, belə səhvlər etməməliyik. Əksinə, rəqibi səhv etməyə məcbur etməliyik. "Zirə"ni təbrik edirəm.

- Zədəli futbolçuların durumu necədir?

- Mahamadu Banın zədəsi bir həftə çəkər. Luis Paçunun növbəti oyuna hazır olacağını düşünürəm. Sadiq Şəfiyev 2 gün sonra məşqlərə başlayacaq.

- Kaçper Rosa ilə yollar ayrılıb?

- Yox. Hələ bizimlədir.

- Rəqibin aqressiv olduğunu demək olar?

- Oyun sərt keçdi, mənim üçün çox maraqlı oldu. Elə də kobudluq olmadı. Futbol belə mübarizələrlə yadda qalır.

- Meydançanın durumu ilə bağlı nə deyə bilərsiniz?

- Reallıq budur ki, bununla kifayətlənməliyik. Meydança yenidir. Tədricən istədiyimiz vəziyyətə gələcək. Avropada da süni örtüklü meydançalarda yarışlar keçirilir.

- Şahmar Aşurovu gələcəkdə daha çox oynatmağı düşünürsünüz?

- Şahmar çalışqan futbolçudur. Çalışqanlığı onun bu gün həyətdə olmasının səbəbidir. Çatışmayan cəhətləri var.