“Neftçi” yeni baş məşqçi təyinatına tələsmək istəmir.

Prosport.Az futbolinfo.az-a istinadən xəbər verir ki, paytaxt klubu bir neçə namizəd arasından seçim edir, amma qərar vermək üçün ən doğru variant üzərində dayanmaqda israrlıdır.

Əslində, bakılılar Samir Abasov seçimində əvvəlki təyinatlarla müqayisədə daha doğru davranmışdı. Komandayla çempionluq qazanmış yerli məşqçi gətirilmiş, onun üçün hər cür şərait yaradılmışdı. Lakin çalışdırıcı ümidi doğrultmadı və istefaya göndərildi.

İndi “Neftçi” elə məşqçi ilə anlaşmalıdır ki, mövcud heyətlə kifayətlənsin, əlavə transferlər istəməsin. Zatən komandada bütün mövqelərdə ciddi rəqabət var, hazırda düşərgədə olanlarla hətta çempionluğa da iddia etmək olar. Sadəcə, işi düzgün qurmaq vacibdir. “Ağ-qaralar” da məhz belə mütəxəssis axtarışındadır.

Yeni baş məşqçinin əcnəbi olacağı dəqiqdir. Yuri Vernidub namizədlərdən biridir, digərləri ilə də danışıqlar aparılır. Klub rəhbərliyinin türkiyəli namizədlərlə danışıq aparması barədə xəbərlər doğru deyil, seçimdə əsas üstünlük Azərbaycan futbolunu, ümumiyyətlə, bu coğrafiyanı daha yaxşı bilənlərə veriləcək.

Hələliksə komandanı “Turan Tovuz”la növbəti oyuna akademiyada çalışan, əvvəllər “Qəbələ” və “Keşlə”də baş məşqçilik təcrübəsi olan Sənan Qurbanovun çıxaracağı dəqiqdir. Yeni baş məşqçi ilə bağlı qərar isə növbəti həftələrdə veriləcək.