AFFA İntizam Komitəsi "Karvan-Yevlax"ın futbolçusu Vadim Abdullayevi 1 oyunluq cəzalandırıb.

Prosport.Az xəbər verir ki, buna yarımmüdafiəçinin "Kəpəz"ə uduzduqları Misli Premyer Liqasının XII turunun oyunundan sonra mediaya futbolun bütövlüyünə təhlükə yaradan, futbol qurumlarının etibarlılığını şübhə altına qoyan açıqlama verməsi səbəb olub.

Matçda sarı vərəqə ilə cəzalanan futbolçu bu qərarın strateji olduğunu bildirmişdi: "Sarı vərəqəni özüm almağa can atırdım. "Şamaxı" ilə vacib ev oyunumuz var. Növbəti turda "Qarabağ"la səfərdə sarı vərəqə almaq risk ola bilərdi. Bu, strateji qərar idi. Ağdam klubu ilə oyunda meydana kim çıxsa, əlindən gələni edəcək. Rəqib illərdir Azərbaycan futbolunun ən güclü komandasıdır".

Yevlax təmsilçisi sözügedən qarşılaşmada 5 oyunçusu sarı vərəqə gördüyü üçün 700 manat ödəyəcək. Bölgə klubu matç zamanı meydana kənar şəxslərin daxil olması ucbatından 2500, azarkeşlərin meydana kənar əşyalar atmasına görə 2000, fanatların hakimlərin ünvanına kütləvi şəkildə təhqiramiz ifadələr səsləndirməsi səbəbindən 5000 manat ziyana düşüb.