UEFA Çempionlar Liqası çərçivəsində “Qarabağ”la oyun Antonio Kontenin “Napoli”nin “sükanı arxasında” son matçı ola bilər.

Prosport.Az xəbər verir ki, bu barədə İtaliya mətbuatı məlumat yayıb.

Xəbərdə vurğulanıb ki, Neapol təmsilçisi A Seriyasının geridə qalan turunda “Atalanta” üzərində 3:1 hesablı qələbə qazansa da, Konte ilə klub prezidenti Aurelio De Laurentis arasında soyuq münasibət davam edir. Bunun əsas səbəbi isə komandanın nəticələri yox, prezidentlə baş məşqçinin bir çox məsələdə eyni fikirdə olmamasıdır.

Düzdür, komanda ölkə çempionatında heç də pis təsir bağışlamır. Belə ki, 3-cü sırada qərarlaşan “Napoli” lider “Roma”dan cəmi 2 xal geri qalır. Lakin Çempionlar Liqasındakı uğursuz nəticələr Kontenin sonunu tezləşdirə bilər. İlk 4 turda cəmi 4 xal toplayan İtaliya klubunun pley-off şansı getdikcə təhlükə altına girir. Komandanın “Qarabağ”la bugünkü qarşılaşmada mümkün xal itkisi Kontenin istefaya göndərilməsini gündəmə gətirəcək. Bu halda De Laurentis baş məşqçi dəyişikliyini İdarə Heyətinə təklif edəcək. Klub prezidenti hətta bu posta yeni namizədlərini də müəyyənləşdirməyə başlayıb.

Qeyd edək ki, bu gün “Dieqo Armando Maradona” stadionunda keçiriləcək “Napoli” – “Qarabağ” oyunu Bakı vaxtı ilə saat 00:00-da başlayacaq.