UEFA Çempionlar Liqasının V turunda “Qarabağ”ın rəqibi olan “Napoli”nin baş məşqçisi Antonio Konteni Tyaqo Motta əvəzləyə bilər.

Prosport.Az xəbər verir ki, mütəxəssisin “Napoli”yə planlaşdırılan qayıdışı hələ də böyük sual altındadır. Tərəflər arasındakı münasibətlər son günlərdə olduğu kimi, gərgin olaraq qalır.

Klub prezidenti baş məşqçiyə açıq şəkildə bildirib ki, əgər ayrılıq olacaqsa, istefa qərarını o özü verməlidir. Kontenin hansı qərar verəcəyi isə hələlik bilinmir.

Xatırladaq ki, Konte A Seriyasının XI turunda “Bolonya”ya 0:2 hesabı ilə uduzduqdan sonra bir həftəlik istirahətə yollanmışdı. 56 yaşlı mütəxəssisin bu gün işə qayıdacağı gözlənilir. Hazırda komandanın məşqlərini onun köməkçisi Kristian Stellini aparır.

Qeyd edək ki, “Napoli” UEFA Çempionlar Liqasının əsas mərhələsində “Qarabağ”ın rəqibidir. Komandalar arasındakı qarşılaşma noyabrın 26-da, Bakı vaxtı ilə 00:00-da İtaliyada keçiriləcək.