"Hazırkı vəziyyət odur ki, stadionun qazonu artıq gənc, təbii ot örtüyünə malikdir. Zaman keçdikcə daha da yaxşılaşacaq. Görülən işlər çox geniş miqyaslı idi. Süni qazon çıxarılıb, FIFA standartlarına uyğun drenaj və ən yüksək keyfiyyətli peşəkar suvarma sistemi quraşdırılıb. Dəqiqliklə düzəldilib və hamarlanıb. Ən yüksək keyfiyyətli Avropa otlarından istifadə edilib. Ot açılış matçından ("Şamaxı" ilə matçı nəzərdə tutur – red.) cəmi 5 həftə 4 gün əvvəl əkilmişdi. 2,5 ay ərzində əldə edilənlər inanılmazdır".
Bunu Prosport.Az-a Tovuz şəhər stadionunun təbii ot örtüyünün salınmasına rəhbərlik etmiş "Caspian Sport Landscape" şirkətinin ingilis direktoru Fil Şarples deyib.
O bildirib ki, "Şamaxı" ilə oyundan sonra qazon korlansa da, tezliklə düzələcək: "Süni meydançalar ani nəticə verir, amma futbolçular təbii orqanik meydançalara üstünlük verir. Tovuz artıq orqanik meydançadır. Zamanla meydança yetkinləşəcək və Azərbaycanda ən yaxşılardan birinə çevriləcək. Sadəcə, bir az vaxt lazımdır. Çox tezliklə hər şey yaxşı olacaq.
Klub bu qazonu qorumalıdır. Onlar oyun infrastrukturunu təkmilləşdirməyə çalışır. Mətbuat da daxil olmaqla hamının istədiyi budur. Təbii ot örtüyü olan meydançaların böyüməsi və ideal hala gəlməsi üçün vaxta ehtiyac olduğunu anlayaraq vəziyyəti dəstəkləyin və kömək edin. Digər klublar "Turan Tovuz"un etdiklərini təkrarlamalıdır".
Klubun "Şamaxı" ilə matçda yeni salınmış təbii ot örtüyünün korlanması nəticəsində klubun 150 min manat ziyana düşdüyünü xəbər vermişdik. Ancaq o bu sualı nə təkzib, nə təsdiq edərək bunları bildirib:
"Gəlin klubu dəstəkləməyə çalışaq ki, digər komandalar da meydançalarını təbii hala gətirsin. Hamının istədiyi budur. Futbolçular, azarkeşlər və həmçinin mətbuat da bunu istəyir.
Bizim digər klubları da "Turan Tovuz"un etdiklərini təkrarlamaq üçün təşviq etmək şansımız var. Tovuzda meydançanı düzəltməyimizə bizə vaxt verin".
Sonda Fil Şarples onu da bildirib ki, "Qəbələ" və ya "Sumqayıt"da da bu cür qazon tətbiq olunur: "Bunu Qəbələ və ya Sumqayıtda, yaxud "Dalğa Arena"nın qarşısındakı məşq meydançalarında da etmişik".
Səbuhi Musa