Yay transfer dönəminin fəal komandalarından olan “Neftçi” heyətini gücləndirməkdə davam edir.

Prosport.Az futbolinfo.az-a istinadən xəbər verir ki, paytaxt klubu dayaq yarımmüdafiəçisi İdrissa Dumbiya ilə danışıqları yekunlaşdırıb.

Fil Dişi Sahilidən olan 27 yaşlı orta sahə oyunçusu ilə uzun müddətdir danışıq aparan “ağ-qaralar”, nəhayət ki, onunla ortaq məxrəcə gəlib. Tərəflər arasında müqavilənin bütün detalları artıq razılaşdırılıb.

İndi qalır münasibətləri rəsmiləşdirmək. Milli komandaların oyunları ilə bağlı yaranmış fasilə dönəmində – yəni bu həftəsonu futbolçu Bakıya gələcək. Dumbiya rəsmi müqaviləyə qol çəkdikdən sonra yeni komandası ilə məşqlərə qoşulacaq.

Yay fasiləsində Qətərin “Əl-Əhli” klubundan ayrılan oyunçu “Neftçi”yə sərbəst futbolçu kimi keçəcək.

Qeyd edək ki, İdrissa Dumbiya karyerası ərzində “Anderlext”, “Axmat”, “Sportinq”, “Hueska”, “Alanyaspor” kimi klublarda çıxış edib.