"İstədiyimiz heyətlə meydana çıxa bilmirik. Bütün oyunlar çətin keçir. Nəsə etmək istəyirik. Sadəcə cüzi səhvləri təkrarlayırıq və istəmədiyimiz qollar buraxırıq. Amma komandanı istədiyimiz formaya salacağıq. Rəqibi təbrik edirəm".

Prosport.Az xəbər verir ki, bu sözləri “Kəpəz”in baş məşqçisi Azər Bağırov Misli Premyer Liqasının XI turunun “Sabah”la oyunundan sonra keçirilmiş mətbuat konfransında deyib.

O, jurnalistlərin suallarını cavablandırıb.

- Heyətlə bağlı problem var idi?

- Ötən mövsüm də komandanı götürdükdən sonra 3 məğlubiyyət yaşadıq, ardınca bir qələbə qazandıq. İndi isə əksi oldu. Enişlər yaşadıq. Bu gün Dioqo Verdaşka yox idi. Ötən mövsüm tam fərqli vəziyyət idi. Səbəbləri bilirəm. Amma problemlərin həlli bunda deyil. Qışa qədər maksimum xallar toplamağa çalışacağıq.

- Bu mövsüm Premyer Liqada qalmaq potensialınız var?

- Ötən mövsüm 32 xal yığmışdıq. Qışdan sonra ilk "4-lük"də idik. Komandaların sayı çox olduqca, xallar bölünür. Bu səbəbdən 20-21 xal bəs edəcək ki, hansısa komanda Premyer Liqada qalsın. "Karvan-Yevlax" dünən son dəqiqələrdə qol buraxdı. Bu gün 2-ci qolu vursaydıq, geri dönüş edərdik. Daha yaxşı olacağıq. Qışdan sonra 17 oyun olacaq. Çox böyük xallardır.