Azərbaycan Premyer Liqasının hazırkı lideri "Turan Tovuz" 150 min manat ziyana düşüb.

Prosport.Az-ın xəbərinə görə, Tovuz şəhər stadionunun yeni istifadəyə verilmiş təbii öt örtüyü Premyer Liqanın X turunun "Şamaxı" ilə matçında (2:1) ciddi zədələnib.

Nəticədə "Turan Tovuz" rəhbərliyi 150 min manat yenidən xərc çəkib qazonu yeniləməlidir. Hazırda klub rəhbərliyi noyabrın sonunda XIII tur çərçivəsində Tovuzda keçiriləcək "Neftçi" ilə matç üçün qazonu hazır vəziyyətə gətirməyə çalışır.

Onu da bildirək ki, stadionun qazonuna cavabdeh olan britaniyalı Fil Şarples qazonun "Şamaxı" ilə matça hazır olmadığını bildirsə də, klub rəhbərliyi risk alaraq bu matçı Bakıda yox, doğma azarkeş dəstəyi önündə keçirmək istədiyini israrla vurğulayıb. Klub rəhbərliyi "Turan Tovuz"un sabiq baş məşqçisi Ayxan Abbasovla prinsipial olan matçda yerli publika önündə qalib gəlmək istəyib. 

Nəticəsi də bəllidir. Çəkilən əziyyət hədər gedib və klub 150 min manat ziyana düşüb. İndi sual doğur: bu prinsipiallığa və bu 3 xala görə bu qədər ziyana düşməyə dəyərdimi?

Qeyd edək ki, "Turan Tovuz" stadionunun qazonunun sünidən təbiiyə keçirilməsi müddətində ev oyunlarını "Qarabağ"a məxsus "Azərsun Arena"da keçirib.