Rusiya mətbuatı Çempionlar Liqasının IV turunda bu gün Bakıda keçiriləcək “Qarabağ” – “Çelsi” (İngiltərə) oyunu ilə bağlı yazı dərc edib. 

Prosport.Az xəbər verir ki, "Championat" nəşri Azərbaycan təmsilçisinin avrokubok mövsümünə uğurlu start verdiyini xüsusi vurğulayıb:

"Qarabağ" Liqa mərhələsinin startında yaxşı təsir bağışladı. Azərbaycan klubu "Benfika"nı (3:2) və "Kopenhagen"i (2:0) məğlub edərək 6 xal qazandı. Ən azı pley-offa çıxmaq ümidləri artdı. İndi Qurban Qurbanovun komandası "Çelsi"ni qəbul edəcək. "Qarabağ" turnirdə əsas oyunlardan birini evdə keçirəcək. Bu mövsüm Bakıya "Çelsi"dən daha yüksək səviyyəli komanda gəlməyib. Buna görə də "Qarabağ" xal qazanmaq üçün əlindən gələni edəcək. Lakin ingilislər favorit olaraq qalır. "Bavariya"ya məğlub olduqdan sonra londonlular "Ayaks" və "Benfika"nı məğlub etdilər. 1/8 finala birbaşa vəsiqə qazanmaq üçün qalib gəlməyə davam etməlidirlər. Yeri gəlmişkən, "Çelsi" və "Qarabağ" artıq 2017/18 mövsümündə Çempionlar Liqasında 2 dəfə qarşılaşıblar. O vaxtı londonlular hər iki oyunda sarsıdıcı qələbələr (6:0 və 4:0) qazanmışdılar".

Qeyd edək ki, bu gün Tofiq Bəhramov adına Respublika stadionunda keçiriləcək oyuna saat 21:45-də start veriləcək.