Rusiyanın qadınlardan ibarət millisi 2027-ci il dünya çempionatının seçmə mərhələsində iştirak edə bilər.

Prosport.Az xəbər verir ki, FIFA və UEFA Rusiya qadınlardan ibarət yığmasının DÇ-2027-nin seçmə mərhələsində iştirakına icazə verilməsi imkanlarını nəzərdən keçirir.

Bildirilir ki, hazırda qadınlardan ibarət millinin seçmə mərhələdə neytral bayraq altında, ev oyunlarının Rusiyadan kənarda keçirilməsi variantı müzakirə edilir. Mümkün variantlar arasında Azərbaycan, Ermənistan, Türkiyə və bir sıra başqa ölkələr var.

Artıq futbolçuların bu ehtimalla bağlı məlumatlandırıldığı və beynəlxalq arenaya qayıtmağa hazır olmağa çağırıldığı iddia edilir.

FIFA və UEFA Rusiya millisi ilə Şimali Makedoniya yığması arasında son yoldaşlıq görüşlərinin Avropa federasiyaları tərəfindən heç bir mənfi reaksiya doğurmadığını da qeyd edib.

Vurğulanıb ki, qadınlardan ibarət yığmanın qayıtmasından sonra oxşar vəziyyət yaranarsa, FIFA və UEFA Rusiyanın gənclər və yeniyetmələrdən ibarət milli komandalarının beynəlxalq arenalara qayıtması məsələsinə yenidən baxacaq.

Qeyd edək ki, Ukrayna ilə müharibə səbəbindən Rusiya idmançıları və komandaları beynəlxalq yarışlardan kənardadırlar.