"Turan Tovuz"un ardından daha bir Premyer Liqa klubu doğma stadionuna qayıdır.
Prosport.Az-ın əldə etdiyi xəbərə görə, söhbət "Karvan-Yevlax" klubundan gedir.
Yevlax şəhər stadionunun qazonu təmirdə olduğundan, Premyer Liqadakı matçını Şamaxı şəhər stadionunda keçirməyə məcbur qalmış Aran təmsilçisi nəhayət doğma məkana qayıdışını reallaşdıracaq.
Bunun üçün bu gün saat 15:00-da AFFA Region Liqasında çıxış edən "Bərdə" ilə yoxlama matçı reallaşdırılacaq. Bu matçı PFL nümayəndələri də izləyəcək. Stadionun süni ot örtüyü Premyer Liqa tələblərinə cavab verəcəyi halda, XII turun "Karvan-Yevlax" – "Kəpəz" matçı Yevlaxda baş tutacaq.
Qeyd edək ki, sözügedən matç Premyer Liqada qalmaq üçün həlledici matçlardan biri hesab olunur. 5 xala malik "Karvan-Yevlax" 3 xala malik olan autsayder "Kəpəz" üzərində doğma azarkeşlərinin dəstəyi sayəsində qələbə qazanmaqla təhlükəli zonadan ayrılmaq niyyətindədir.