Misli Premyer Liqasının X turunun “Sabah” – “Qəbələ” oyunundan (1:0) sonra meydan sahibi komandanın baş məşqçisi Valdas Dambrauskas jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Qələbə münasibətilə azarkeşlərimizi, rəhbərliyi təbrik etmək istəyirəm. Çox çətin, ağır oyun oldu. Çox mübarizə aparan, döyüşən komandaya qarşı oynadıq. Hücum futboluna üstünlük verir, fərqli tərzdə oynayırlar. Eyni zamanda sürətli oyunçuları var. İrəlidə təhlükə yaratmağı bacarırlar. İlk hissədə çox təhlükə yaratdılar. Yaxşı qol şansları oldu. Bizim isə demək olar, ritmimiz yaxşı deyildi. Çalışırıq ki, rəqibi daha çox qapımızdan uzaq saxlayaq. Bugünkü oyunda mental cəhətdən çox iş gördük. Şadam ki, qapımızı toxunulmaz saxlaya bildik. Bəzən elə olur ki, 3 xalı çox çətin əziyyətlə əldə edirsən. Bu gün bunu etdik. Mövsüm uzundur, qarşıda çox oyun var. İkinci hissədəki oyunumuzdan məmnun qaldım. Bəzi hücumlarımız var idi ki, yaxşı bitirə bilərdik. Oyunçuları qələbə münasibətilə təbrik edirəm.

– Aleksey İsayevin durumu necədir?
– Aleksey üçün qayıdış çətin idi. Bu gün daha çox istəyirdik ki, son ötürmələri versin, oyunu bitirsin. Düzdür, oyuna çıxması riskli idi. Uzun müddətdir, oynamır. Amma məşqlərdə çox istəklidir. Oynamaq üçün əlindən gələni edir. Tapşırıqları meydançada yerinə yetirdi.

– Pavel Şafranko ağır zədə alıb. Qış fasiləsində hücumçu transferi nəzərdən keçirilə bilərmi?
– Hələ transfer haqda düşünmürük. Daha çox növbəti görüşü – “Kəpəz”lə matçı fikirləşirik. Yanvara qədər vaxtımız var. Şafranko bu gün ata olub, 2-ci qız övladı dünyaya gəlib. Onu təbrik edirəm. 4 oyundur, Şafrankosuz çıxış edirik. Bu mövqedə həll yollarını tapmağa çalışırıq. Bu, məşqçi heyətinin işidir. Yanvarda turnir cədvəlinə, komandanın durumuna baxacağıq.