"Təxmin etdiyimiz kimi, ağır oyun oldu. "Şamaxı" bu mövsüm üçün kifayət qədər güclənib. Yaxşı futbolçulara malikdir. Oyunlar keçdikcə, gücləri daha da artır. 2-ci hissədə biz daha bütöv oyun nümayiş etdirdik. Qələbəyə layiq idik".

Prosport.Az xəbər verir ki, bu sözləri "Turan Tovuz"un baş məşqçisi Qurban Berdiyev Misli Premyer Liqasının X turunun "Şamaxı" ilə oyunundan (2:1) sonra keçirilmiş mətbuat konfransında deyib. O, jurnalistlərin suallarını cavablandırıb.

- İlk hissənin bu qədər sönük keçməsini nə ilə əlaqələndirirsiniz?

- Həyəcan var idi. Uzun müddətdən sonra öz azarkeşlərimiz qarşısında oynayırdıq. Məşqdə də hiss edilirdi. İkinci hissədə biz daha bütöv oyun göstərdik. Bir az sakitləşmişdilər.

- Stadionun qazonu ilə bağlı fikriniz necədir? Düşünürdünüz ki, bəlkə bir müddət sonra oynayardınız?

- Qazonla bağlı vəziyyət aydındır, özünüz hər şeyi gördünüz. Oyunla bağlı danışaq.

- "Turan Tovuz" hazırda liderdir. Milliyə yalnız Faiq Hacıyev cəlb edilir. Artıq o da start heyətində yer almır. Bu, sizi qayğılandırır?

- Təkcə Faiqə yox, digərlərinə də aiddir, kim güclüdürsə, o da oynayır.

- Ayxan Abbasov bildirdi ki, hər iki komanda 1 xala layiq idi. Siz necə düşünürsünüz?

- 2-ci hissədə biz daha üstün oynadıq. Daha çox qol epizodlarımız var idi. Biz qələbəyə daha layiq idik.

- Müdafiə xəttinin çıxışından, xüsusilə də Emmanuel Hakmandan razı qaldınız?

- Hakman heç vaxt olmadığı qədər həyəcanlı idi. Əsasən də ilk hissədə sadə səhvlərə yol verirdi. 2-ci hissədə daha rahat və daha yaxşı oynadı.