Misli Premyer Liqasının X turunun “Neftçi” – “Kəpəz” oyunundan (5:1) sonra meydan sahibi komandanın baş məşqçisi Samir Abasov jurnalistlərin suallarını cavablandırıb.

Prosport.Az xəbər verir ki, mütəxəssis media nümayəndələri ilə görüşdə bunları deyib.

– Komanda sanki daha istəklidir. Vensan Abubakarın gəlişinin bunda nə qədər rolu var?
– Böyükdür. Futbolçular təcrübəli oyunçunun oyununa uyğunlaşmağa çalışırlar. Bütün oyunlarda istəkli olmuşuq, daha yaxşı oynadığımız da olub. Ötən dəfə də dedim, konfransı bir futbolçuya həsr edəcəyiksə, digər uşaqlara haqsızlıq etmiş olacağıq.

– Ardıcıl 3-cü qələbəni qazandınız. Qarşıda “Qarabağ”la oyun var. Fikirləriniz nədir?
– “Qarabağ” gün keçdikcə daha güclənir. Hələ oyuna vaxt var. “Qarabağ”a, Qurbana “Çelsi” ilə oyunda uğurlar arzu edirəm. İnşallah, qələbə qazanarlar. “Qarabağ”ın Avropadakı hər oyununda yanındayıq. Derbiyə gəlincə, məncə yaxşı oyun olacaq. İki yaxşı komanda üz-üzə gələcək. İnanıram ki, derbiyə layiq oyun olacaq.

– Nəticədən, oyundan razısınız. Bəs, narazı qaldığınız hansısa məqam oldu?
– Bəzi situasiyalarda aşırı fərdi oynayırıq. Qələbədən sonra nələrəsə göz yummaq olar.

– İmad Faraj sanki topu çox özündə saxlayırdı…
– Faraj topla olanda ətrafındakı oyunçular həddindən artıq istəkli idi. Onlar özləri də nələrsə etmək istəyirdi, amma Faraj özü oynadı. Qeyd etdiyim narazı qaldığım məqam bu idi.