"Qarabağ"ın bütün futbolçularını cərimələdiyi iddia olunur.

Prosport.Az sportinfo.az-a istinadən xəbər verir ki, bu, Qurban Qurbanovun qərarıdır.

Baş məşqçinin belə addım atmasına səbəb Çempionlar Liqasının Liqa mərhələsinin III turunda qeydə alınan nəticədir.

Azərbaycan təmsilçisi İspaniya səfərində "Atletik"lə üz-üzə gəlib. Ağdam klubu "San Mames" stadionunda keçirilən oyunu 1:3 hesabı ilə uduzub. Bu, onların arıdıcıl 2 qələbədən sonra liqa mərhələsində ilk məğlubiyyəti olub.

Q. Qurbanovu məyus edən yalnız nəticə deyil. Təcrübəli mütəxəssisi narazı salan futbolçularının sərgilədiyi mübarizədir. O, istənilən səviyyədə çıxış etməmələri, əksər tapşırıqlarının yerinə yetirilməməsi üzündən oyunçularını cərimələməyi zəruri sayıb.

Məbləğ kifayət qədər böyükdür. Həmin vəsait komanda üzvlərinin oktyabr ayı üçün maaş fondundan tutulacaq.

"Qarabağ" bundan əvvəl keçirdiyi hər 2 görüşdə qalib gəlmiş, "Atletik" isə xal qazanmamşdı.

İlk turda "Benfika"nı 3:2, II turda isə "Kopenhagen"i 2:0 üstələmiş Qurban Qurbanovun komandası hazırda sıralamada 6 xalla 13-cüdür.

Qeyd edək ki, ÇL-in Liqa mərhələsində ilk 8 yeri tutan komanda birbaşa 1/8 finala, 9-24-cü yeri tutanlar isə pley-off mərhələsinə vəsiqə qazanır. 25-36-cı yeri tutanlar avrokuboklarda çıxışlarını başa vururlar.