“Qarabağ”ın sabiq futbolçusu Juninyo qışda komandasını dəyişə bilər.

Prosport.Az Braziliya mətbuatına istinadən xəbər verir ki, 28 yaşlı hücumçu klubu “Flamenqo”da qalmağı düşünmür.

Buna səbəb forvardın əsas heyətə düşə bilməməsidir. Hətta vəziyyət o həddə çatıb ki, baş məşqçi Filipe Luis aparıcı hücumçu Pedronun yoxluğunda da Juninyoya güvənmir və vinger Bruno Enrikeni hücumun mərkəzində oynadır.

Hələ yay fasiləsində “Qarabağ” da daxil olmaqla bir neçə klub Juninyonu heyətinə qatmağa çalışıb. Sadəcə, Filipe Luis hücum xəttində oyunçu azlığı səbəbindən keçidə mane olmuşdu. Lakin bu dəfə çalışdırıcı da onun gedişinə qarşı çıxmayacaq. Bu səbəbdən forvard indidən yeni klub axtarışına başlayıb. Onun Braziliya klubu ilə müqavilə müddəti 2028-ci ilin sonuna qədərdir.

Qeyd edək ki, Juninyo 2023-cü ilin yayından 2025-ci ilin yanvarına qədər “Qarabağ”ın formasını geyinib. O, 5 milyon avro qarşılığında Braziliya klubuna satılıb.