UEFA Çempionlar Liqasının əsas mərhələsinin IV turunda “Qarabağ”la qarşılaşacaq “Çelsi” noyabrın təqviminə əsasən planını qurub.

Prosport.Az Britaniya mətbuatına istinadən xəbər verir ki, London təmsilçisi milli komandaların oyunu ilə əlaqədar yaranacaq fasiləyə qədər xal itirmək istəmir.

Baş məşqçi Enzo Mareskanı ən çox narahat edən məqam Premyer Liqa matçları arasında Bakıya uzun səfərdir: “Çelsi” liderlər qrupundan uzaq düşməmək üçün mümkün qədər az xal itirməlidir. Əks təqdirdə ilk "4-lüy"ə düşmək problemə çevrilə bilər. Bunun baş verməməsi üçün "zadəganlar" xal itirməməlidir. İndiki məqamda əsas problem “Tottenhem”lə qarşıdakı matçdan sonra Bakıya yollanmaq və döndükdən sonra “Vulverhempton”la üz-üzə gəlməkdir”.

Mareska bu periodda bütün futbolçuların xidmətindən yararlanmaq istəyir: “Tottenhem” önünə əsas heyətin çıxacağı şübhəsizdir. Ancaq “Qarabağ” və “Vulverhempton”la qarşılaşmalarda müxtəlif rotasiyalar qaçılmazdır. Bəzi aparıcı futbolçulara Azərbaycan səfərində istirahət verilməsi gözlənilir”.

Qeyd edək ki, “Qarabağ” – “Çelsi” oyunu noyabrın 5-də Tofiq Bəhramov adına Respublika Stadionunda keçiriləcək.