“Qarabağ”ın futbolçusu Musa Qurbanlı istəyən İtaliya klubunun adı bəlli olub. 

Prosport.az xəbər verir ki, bu, “Torino” klubudur. İtaliya mətbuatı Turin klubunun idman direktoru Davide Vanyatinin əsas transfer hədəfinin Qurbanlı olduğunu bildirib.

Gənc və maraqlı profillər axtarışında olan klubun skaut şöbəsinin rəhbəri hücum xəttini Azərbaycan millisinin üzvü ilə gücləndirməkdə maraqlıdır. Xviça Kvaratsxelianın “Napoli”dəki parlaq çıxışını nəzərə alan Davide Vanyati daha bir qafqazlının A seriyası üçün yeni kəşf olacağına inanır. Bu transferin baş tutmasında millimizin italiyalı baş məşqçisi Canni De Byazinin də rolu var.

Qeyd edək ki, cari mövsüm Premyer Liqada 20 qolla bombardirlər yarışına başçılıq edən Musa Qurbanlının “Qarabağ”la müqavilə müddəti 2026-cı ilin yayına qədərdir.