UEFA 21 yaşadək futbolçulardan ibarət Azərbaycan millisinə görə AFFA-nı cərimələyəcək.

Prosport.Az xəbər verir ki, buna yığma üzvlərinin Avropa çempionatının seçmə mərhələsindəki son matçlarda çox vərəqə alması səbəb olub.

Oyunçular sentyabrın əvvəlində Portuqaliyaya 5 cavabsız qolla məğlub olduqları qarşılaşmada 5 sarı vərəqə görüblər. UEFA oktyabrın əvvəlində buna görə U-21 millisinə rəsmi xəbərdarlıq da edib. Hətta bu Avropa futbol qurumunun rəsmi saytında da öz əksini tapıb.

Həmin xəbərdarlıqdan sonra yığma oktyabrın 14-də Bakıda Şotlandiya ilə bərabərə qalıb - 3:3. Bu matçda 5 oyunçu sarı, biri isə 2-ci sarıdan qırmızı vərəqə görərək meydandan qovulub.

UEFA cərimənin məbləğini 1 ay ərzində açıqlayacaq.