UEFA Çempionlar Liqasının əsas mərhələsinin III turunun "Qarabağ”la oyununda (3:1) zədələnən İspaniyanın “Atletik”in (Bilbao) komandasının kapitanı İnyaki Uilyamsın durumu müəyyənləşib.

Prosport.Az xəbər verir ki, klub rəsmi açıqlama yayaraq, Qana millisinin üzvünün tibbi müayinədən keçdiyini və onun sağ ayağının qasıq əzələsində zədə aşkarlandığını bildirib.

Futbolçunun vəziyyəti qənaətbəxş qiymətləndirilib, amma onun bərpa müddəti barədə dəqiq məlumat verilməyib. İspaniya mətbuatı isə bu tip zədələrin adətən 2–3 həftəlik fasilə tələb etdiyini yazır. Onun bu həftə La Liqada "Xetafe" ilə oyunu buraxacağı dəqiqləşib.

Qeyd edək ki, İnyaki Uilyams matçın 38-ci dəqiqəsində özünü narahat hiss etdiyi üçün meydanı tərk etməli olub. Onu Aleks Berenqer əvəzləyib.