"Qarabağ"ın futbolçusu Kevin Medina Çempionlar Liqasının əsas mərhələsində İspaniyada "Atletik"lə keçirəcəkləri III tur oyunundan əvvəl təşkil olunan mətbuat konfransında fikirlərini bölüşüb .

Prosport.Az xəbər verir ki, kolumbiyalı müdafiəçi görüşün hər iki tərəf üçün ağır keçəcəyini bildirib:

“Bu, həm onlar, həm də bizim üçün çox çətin oyun olacaq. Hazırlığımız yalnız Uilyams qardaşlarına qarşı deyil, bütövlükdə “Atletik” komandasınadır. Onlar klubun simalarıdır, amma biz təkcə onlara qarşı oynamırıq. Sabah bütün komandaya qarşı ciddi mübarizə aparmaq üçün hazırıq”.

K. Medina, həmçinin ötən mövsümdəki çıxışından nəticə çıxardığını və bu mövsüm daha yaxşı formada olduğunu vurğulayıb:
“Keçən mövsüm öz istədiyim səviyyədə deyildim və bu, mənim üçün böyük motivasiya oldu. Öz üzərimdə çox işlədim, psixoloji cəhətdən də daha güclü oldum. Hazırda əla hiss edirəm. İnsan səhvlərdən nəticə çıxarmalıdır və mən bu mövsüm əvvəlkindən daha yaxşıyam”.