Misli Premyer Liqasının VIII turunun “Sabah” – “Zirə” oyunundan (3:0) sonra ev sahibi komandanın baş məşqçisi Valdas Dambrauskas jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Əvvəlcə bütün “Sabah” ailəsini təbrik edirəm. Həqiqətən layiq olduğumuz qələbəni qazandıq. Oyuna çox yaxşı hazırlaşmışdıq. Rəqibi təhlil etmişdik və deyə bilərəm ki, oyunboyu inamlı olan biz idik. Oyunçular verdiyim tapşırıqları mükəmməl icra etdilər. “Zirə”yə böyük hörmətimiz var. Məşqçi işi olan ən yaxşı komandalardan biridir. İlk hissədə bütün üstünlük bizdə oldu, rəqibə imkan vermədik. “Zirə”nin fasilədən sonra təzyiqi artıracağını və əks-hücum şansımızın olacağını bilirdik. Bu qələbədə bütün futbolçuların əməyi var. Belə davam etməli, “Sabah”ın kimliyini yaratmalıyıq. Hər iki komandada itkilər var idi. Pavel Şafranko, İqor Noqeyra və Coy Lens Mikels zədəli idi. Bu gün şans qazanan gənclər çox yaxşı performans göstərdilər. Xəyal Əliyevi, Maludanı qeyd etməliyəm. Dünyanın ən xoşbəxt məşqçisiyəm ki, gənclərin belə yaxşı inkişafını görürəm.

– Artıq neçənci oyundur ki, paltardəyişmə otağına qaçaraq gedirsiniz. Bu, nə ilə bağlıdır?
– Videoanalitikimiz var. Oyunboyu meydanda baş verən səhvləri, çatışmazlıqları göstərir. Daha çox vaxt qazanmaq üçün yanına erkən getmək istəyirəm.