Azərbaycan milli futbol komandasının hücumçusu Renat Dadaşovun DÇ-2026-nın seçmə mərhələsinin IV turunda Ukrayna yığmasına qarşı oyunda (1:2) iştirak etməməsinin səbəbi məlum olub.

Prosport.Az azerisport.com-a istinadən xəbər verir ki, 26 yaşlı hücumçu Fransaya qarşı keçirilən matçın (0:3) 2-ci hissəsində meydana buraxılmalı imiş. Lakin taktiki və oyunla bağlı səbəblərə görə onun əvəzinə başqa bir futbolçu oyuna daxil edilib. 

Bu qərar Polşanın "Motor" klubunda çıxış edən və hazırda ən yaxşı formasında olmayan hücumçunun xoşuna gəlməyib və o, narazılığını baş məşqçi Ayxan Abbasova çatdırıb. Nəticədə Dadaşov növbəti oyunun - Ukrayna ilə görüşün iştirak ərizəsinə salınmayıb.

Hazırda Renat Dadaşovun Ayxan Abbasov milli komandanın baş məşqçisi olduğu müddətdə milliyə çağırılıb-çağırılmayacağı sual altındadır.