Azərbaycan millimizin futbolusu Mahir Emreli son vaxtlarda oyununun tənqid olunmasına münasibət bildirib.

Prosport.Az xəbər verir ki, sosial şəbəkə hesabında paylaşım edən 28 yaşlı futbolçu bunları yazıb:

"Hazırda mənim üçün asan dövr deyil və hər şey olmalı olduğu kimi getmir. Klubumda məndən asılı olmayan səbəblərdən son zamanlarda oynamıram. Bu da milli komandada oyunuma öz təsirini göstərir. Amma heç vaxt ruhdan düşmürəm. Səbrimlə, inamımla, məşqlərimlə öz işimə köklənirəm. Bu yolda mənə ən böyük dayaq milli komandam, baş məşqçimizin etimadı və dəstəyi oldu. Onların bu güvəni mənim üçün həm məsuliyyət, həm də motivasiyadır. Vacib olan dayanmamaqdır. Heç bir yol asan deyil. Son 3 oyun da məhz bu cür, yeni və ümidverici bir yolun başlanğıcıdır. Təbii ki, bu yol da asan olmayacaq. Amma siz, əziz azarkeşlər, bizim üçün sadəcə tribunadakı səs deyilsiniz. Siz bizim meydandakı iradəmiz, gücümüz və qürur mənbəyimizsiniz. Yaxşı günlər qarşıdadır".

Qeyd edək ki, Mahir Emreli son vaxtlar çıxış etdiyi Almaniyanın "Kayzerslautern" klubunda heyətə düşə bilmir.