Ukrayna millisinin yarımmüdafiəçisi Ruslan Malinovski DÇ-2026-nın seçmə mərhələsində Azərbaycan yığması üzərində 2:1 hesablı qələbəni şərh edib.

Prosport.Az xəbər verir ki, Ukrayna mətbuatına danışan "Cenoa"nın futbolçusu meydanda bütün gücünü ortaya qoyduğunu deyib:

"Əlbəttə, yorulmuşam. Uzun zamandır bu cür tempdə oynamamışdım. Asan olmadı, bütün gücümü meydana qoydum. Komandaya görə çox şadam. İlk hissədə çoxlu qol epizodları yaratdıq, lakin son ötürmələrdə bir qədər dəqiqlik çatmadı. Bəzi səhvlər etdik, adətən bizdə belə olmur. Amma ən vacibi nəticədir".

Malinovski rəqiblərin getdikcə gücləndiyini də vurğulayıb: "Görürük ki, bütün yığmalar, hətta Azərbaycan belə, futbol oynamağı bacarır. Oyun asan olmadı, amma düşünürəm ki, əsas məsələ qələbədir. İndi növbəti oyuna hazırlaşırıq".

4 turdan sonra Ukrayna 7 xalla D qrupunda 2-ci yerdə qərarlaşıb. Fransa 10 xalla liderdir, İslandiya 4, Azərbaycan isə 1 xal toplayıb. Noyabrda Ukrayna millisi Fransa və İslandiya ilə həlledici qarşılaşmalara çıxacaq.