Azərbaycan milli komandasının futbolçusu Mahir Emreli DÇ-2026-nın seçmə mərhələsində Ukraynaya 1:2 hesablı məğlubiyyətdən sonra suallarını cavablandırıb.
Prosport.Az xəbər verir ki, hücumçu yığmanın çıxışı ilə yanaşı, Almaniyanın "Kayzerslautern" klubunda heyətə düşə bilməməsini də şərh edib.
- Fransa və Ukrayna ilə matçlar barədə düşüncələriniz necədir?
- Fransa ilə müdafiə futbolu oynadıq. Çalışırdıq rəqibin hücumlarının qarşısını alaq. Fransanın gücü hamıya bəllidir. Bizdən üstün rəqiblər belə, Fransa yığmasına qarşı oyunda çətinlik çəkir. Ukrayna ilə oyunda hiss olunurdu ki, yaxşı nəticə əldə etmək istəyirik. Yığmada ölkəni sevməyən futbolçu yoxdur. Sistem doğru olanda rəqibə qarşı istədiyimiz oyunu göstərə bilirik.
- Azarkeşlərin Fransa ilə oyunda zəif çıxışınıza görə sizi qınaması səbəbindən Ukrayna ilə görüşdə ehtiyatda qaldığınızı demək olar?
- İnanmıram, Ayxan müəllim buna görə qərar versin. Əvvəldən danışılmışdı ki, Fransa ilə oyunda təcrübəli futbolçular lazımdır, ona görə mənə üstünlük verilmişdi. Fransızlarla matçda hər kəs əlindən gələni etdi. İnsanların narazı olduğu məqamı anlaya bilmirəm. Bəlkə də buna pozitiv yanaşmaq lazımdır. Fransaya 45 dəqiqə qol şansı vermədik. Meydanın içində özümüz inanmağa başlayırdıq ki, xal almaq olar (gülür). Amma rəqibin top səviyyəli futbolçuları var və onlar oyunun taleyini həll etdilər.
- İki oyunda çərçivəyə cəmi 2 dəqiq zərbə vurmuşuq...
- Zərbələrdən biri qol olub (gülür). Başa düşürəm ki, belə məqamlara diqqət yetirirsiniz. Bir neçə ölkədə oynamışam. Media nümayəndələrinin ilk öncə neqativə, sonra isə pozitivə baxdığının şahidi olmuşam. Əslində, bu, yaxşı şeydir. Nəzərə almalıyıq ki, Ayxan müəllimin 3-cü oyunudur. Yeni məşqçi, yeni sistem deməkdir. Bizim birlikdə olmağa çox vaxtımız olmayıb. Tək mən yox, yerli çempionatda limit ləğv olunduğu üçün bir neçə futbolçu komandasında daimi çıxış etmir.
- İslandiya Fransa ilə heç-heçə oynadı. Bu barədə nə deyə bilərsiniz?
- Fransa və İslandiya kimi komandaların üzvləri illərdir birlikdə oynayırlar. İndi baş məşqçimiz yerlidir. Mentalitetimizi bilir və bu da bizə əlavə motivasiya verir. Zamanla yaxşı milli olduğumuzu sübut edəcəyik. Ən azı bu rəqiblərlə başa-baş mübarizə apara bilərik.