Azərbaycan milli komandası DÇ-2026-nın seçmə mərhələsinin IV turu çərçivəsində Polşada Ukrayna millisi ilə qarşılaşacaq.

Prosport.Az xəbər verir ki, millimizin müdafiəçisi Elvin Cəfərquliyev oyundan öncə keçirilən mətbuat konfransında jurnalistlərin suallarını cavablandırıb.

"Sabah çox yaşı komandaya qarşı oynayacağıq. Müəyyən təlimatları almışıq, rəqibi analiz etmişik. Bu oyuna hazırlaşmaq üçün çox vaxtımız yox idi. Amma sabahkı matça komanda olaraq yaxşı hazırlaşıb, tam konsentrasiya olub, maksimum nəticə nədirsə, onun üçün çalışacağıq".

- Fransa ilə çətin oyundan sonra Krakova gəlmisiniz. Bərpa oluna bilmisiniz?

- Çox da vaxtımız yoxdur. Amma düşünürəm ki, komanda olaraq yaxşı bərpa olmuşuq. Əsas odur ki, psixoloji hazır olaq. Fransa ilə görüşdə çox yorulduq. Yaxşı mübarizə apardıq. Sabah da yaxşı oyun olacaq. Fransa ilə oyunu götürsək, sabahkı görüşdə daha da yorulacağıq. Rəqibi tanıyırıq. Yaxşı komandamız var. Sabah həm ağıllı, həm də özümüzə inamlı şəkildə çıxış etməliyik.

- Bakıda Ukrayna ilə 1:1 oynamışdınız və matçın ən yaxşısı idiniz. Həmin görüşdəki heç-heçə sabahkı matça təsir edəcək?

- Həmin oyundan sonra Fransa ilə oynamışıq. Yaxşı çıxış etmişdim. Amma Ukraynadan əsas olan xal almağımız idi. Öz performansımı kənara qoyuram, əsas komandadır. Motivasiyamız var, özümüzə inanırıq. Sabah çox vuruşmalıyıq ki, istədiyimiz nəticəni əldə edək. Qrupda çox çətin komandalar var. Ona görə də sabah qazanacağımız xal, qalibiyyət qrupdakı yerimizi dəyişə bilər. Bunun da ayrıca motivasiyası var.