DÇ-2026-nın əsas mərhələsinə vəsiqə qazanan daha bir komanda müəyyənləşib.

Prosport.Az xəbər verir ki, bu, Əlcəzair yığması olub. Komanda ötən gecə Afrika zonası üzrə seçmə məhələnin IX turu çərçivəsində Somaliyə 3:0 hesabı ilə qalib gəlməklə vəsiqəni rəsmiləşdirib. Yeri gəlmişkən, "Qarabağ"ın sabiq futbolçusu, ötən yay komandadan ayrılan Yassin Benzya matça ehtiyatda başlayıb və yalnız 85-ci dəqiqədə meydana daxil olub.

Beləliklə, Əlcəzair G qrupunda sona 1 tur qalmış xallarının sayını 22-yə çatdırıb və ən yaxın izləyicisi Uqandanı 4 xal qabaqlayıb.

Əlcəzair DÇ-2026-da iştirakı rəsmiləşən 20-ci ölkədir. Daha əvvəl Yaponiya, İran, Cənubi Koreya, İordaniya, Özbəkistan, Avstraliya, Mərakeş, Tunis, Misir, Argentina, Ekvador, Braziliya, Uruqvay, Paraqvay, Kolumbiya və Yeni Zelandiya da bunu bacarıb. ABŞ, Kanada və Meksika isə ev sahibi kimi mundiala vəsiqə qazanıblar.

Qeyd edək ki, DÇ-2026-nın final mərhələsi gələn il iyunun 11-dən iyulun 19-dək ABŞ, Kanada və Meksikada təşkil olunacaq. DÇ-2026-da tarixdə ilk dəfə olaraq 48 komanda mübarizə aparacaq.