Misli Premyer Liqasının VII turunun “Qəbələ” – “Şamaxı” oyunundan (0:1) sonra meydan sahibi komandanın baş məşqçisi Kaxaber Sxadadze jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bölüşüb.

– Oyuna gərgin başladıq, fərdi səhvlərdən qol buraxdıq. Qol imkanlarımız olsa da, fürsətləri dəyərləndirə bilmədik. Artıq neçənci oyundur, qol fürsətlərindən yararlana bilmirik. Sonradan meydana daxil olan futbolçular elə də yaxşı deyil. Ehtiyat skamyamız zəifdir.

– İstefaya çağıran azarkeşə “gəl” dediniz. Gəlsəydi, nə olacaqdı?
– Başqa suala keçək. Uşaq idi.

– Peşəkar məşqçisiniz. Uşaq idisə, niyə elə yanaşırdınız?
– Uşağa reaksiya vermədim, orada başqa biri var idi, ona reaksiya verdim. O da dərhal qaçdı. Hardasa, 120 kq çəkisi vardı, amma tez getdi. Uşaqlara reaksiya verməmişəm.

– Yayda seleksiya işində səhvlərə yol vermisiniz?
– Seleksiya işində səhvlərə yol verdik. Daha da güclənməliyik. Bəzi futbolçular var ki, Premyer Liqa səviyyəsində deyillər, U-19 komandasına göndərəcəyəm. Bunu etiraf etməliyik. İkinci hissədə kimi meydana buraxaq? Allah qoysa, hər şey yaxşı olar, güclənərik və hər şey düzələr. Böyük klublarda çıxış etmişəm, “Mançester Siti”də oynamışam. Oyundan sonra hər zaman futbolçuya dəstək olurdular. Sona qədər dəstək göstərirdilər. Biz də, onlar da öyrənməliyik. Azarkeş komandanın arxasında dayanmalıdır. Komandamız oyun göstərir. Buna görə də panikaya düşməli deyilik. Sadəcə oyunun gedişində güclənə bilmirik. Ehtiyatda olanlar yerli gənclərdir.

– Milli fasilə zamanı heyəti gücləndirəcəksiniz?
– İndiki vaxtda hansı futbolçunu tapmaq olar, əgər hansısa futbolçu komandasızdırsa, hansı durumda olacaq? Mövsüm mayda başa çatıb və hazırda oktyabrdır. Biz varlı klub deyilik. İstəyirik ki, bu dəqiqə güclənək. Amma dediyim kimi, o futbolçu hansı durumda olacaq. Səhvimizi etiraf edirik. Dekabrda güclənəcəyik. Bu da olmasa, çətin olacaq.