Misli Premyer Liqasının VII turunun “Karvan-Yevlax” – “Sabah” oyunundan (0:2) sonra meydan sahibi komandanın baş məşqçisi Azər Həşimov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Oyunu dəyişmək, qollar vurmaq istədik, amma alınmadı. “Sabah”ı təbrik edirəm. Heyətdə itkilərimiz var. Ona görə qol vurmaqda çətinlik çəkirik.

– “Neftçi” ilə görüşün ən yaxşısı olan Kamran İbrahimov bu gün kuryoz qol buraxdı. Demək olar ki, bu qapıçı eyforiyada idi?
– Yox, belə deməzdim. “Neftçi” ilə oyunda ən yaxşılardan idi. Bu gün də pis dayanmadı. "Doqquzluğ"a gedən qol oldu. O da az-az görünən qollardandır. Futbolçularımıza Kahim Perrisin fərdi keyfiyyəti ilə bağlı məlumat vermişdik. Amma rəqib oradan qapıya zərbə vurmaq yox, ötürmə edirdi. Top da qapıya daxil oldu. O epiozdda Kamran yox, başqası olsaydı, bəlkə də yenə qol alınacaqdı.

– Stadionunuzun durumu nə yerdədir?
– Bu yaxınlarda AFFA-dan gəlib stadionumuza baxacaqlar. Ondan sonra qərar veriləcək. Bizim üçün də asan olardı. Meydançamız hazır olduqdan sonra öz azarkeşlərimizin qarşısında oynamaq bizi ruhlandırardı. Onların dəstəyinə ehtiyacımız var. Bütün oyunları səfərdə keçiririk. Bu da yeni yaranmış komanda üçün çətinlik yaradır. Sabah AFFA-dan gəlib stadionumuza baxacaqlar.