Misli Premyer Liqasının VII turunun “Karvan-Yevlax” – “Sabah” oyunundan (0:2) sonra qonaq komandanın baş məşqçisi Valdas Dambrauskas jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Birinci saniyədən sona qədər dominant olan biz idik. İlk hissədə 2 qol vurduq, amma daha çoxunu edə bilərdik. İstərdim ki, oyunçularım daha çox qol vursun, özlərinə inamı artırsın. Oyunun son dəqiqəsində baş verən hamımızı çox üzdü. Dua edəcəyik ki, Mikelsdə ciddi zədə olmasın.

– Mikelsi sona qədər meydanda saxlamağınız nə ilə bağlı idi?
– Sualı anlamadım. Çünki Mikels hazırda əlimizdə olan yeganə hücumçudur. O, daha çox qol vurmaq arzusundadır. Buna görə onu meydanda saxladım.

– “Sumqayıt”la oyundakı mübahisəli epizodlara Hakimlər Komitəsinin sədri Frank De Blekere şərh verib və o, qərarların doğru olduğunu deyib…
– Hamının öz rəyi var və buna hörmət etməliyik. Bu haqda mübahisə etmirəm. Şəxsən, fərqli ölkələrdə işləmiş hakimlərlə danışdıqdan sonra deyə bilərəm ki, 2-ci qolumuz təmiz idi və hakimin qərarı doğru deyildi. İlboyu belə hallar olacaq. VAR verilən qərarı dəstəkləməlidir. 50/50 situasiyaların olması normaldır. Həqiqətən, 2-ci qolumuzda əllə oyun görmədim. Sübutu olmayan bir şey axtarırmış kimi idik.

– Komanda sanki tam gücünü qoymadı. Bu, sizin tapşırığınız idi?
– Sizinlə razı deyiləm. “Karvan-Yevlax” kimi komandalara – 11 nəfərlə müdafiə olunanlara qarşı hücuma çıxan zaman arxadakı boşluğa diqqət etməlisən. Rəqib bu gün yalnız ilk hissənin sonlarında cərimə meydançamızda topla ola bildi. Oyunboyu üstün olan biz idik. 2-ci hissədə qol imkanlarımız var idi. Uşaqlar güclərini qoydular, sadəcə hücumları sonlandırmada problemlər yaşadıq.

– Mikelsin durumu ciddi olsa, bu, növbəti oyunlarda problem yarada bilər?
– İstər oynasın, istər yox, “Zirə” ilə matç çətin keçəcək. Əfsuslar olsun ki, futbolda belə hallar var. Əlimizdə olan oyunçulardan istifadə edəcəyik. Heyətimizdə ciddi itkilər var. Amma məndən şikayət eşitməyəcəksiniz. Nə vaxtsa deməyəcəyəm ki, bu uşaqlar oynamadı deyə uduzduq.