"Rusların yarışlara buraxılmasından xəbərim var. Mənə görə, bu, ədalətli qərardır. Onun tərəfdarıyam ki, açıq mübarizə olsun. Hər bir halda, ruslar da bizim kimi idmançıdırlar. Təbii ki, onların yarışa qatılmaları Olimpiada, dünya və Avropa çempionatlarını daha maraqlı edəcək".

Bunu Prosport.Az saytına açıqlamasında yunan-Roma güləşi üzrə dünya və Avropa çempionu Eldəniz Əzizli deyib.

O, Ümumdünya Güləş Birliyinin rusiyalı və belaruslu idmançıların neytral statusda yarışa buraxmaları barədə verdiyi qərarı düzgün hesab etdiyini bildirib: 

"Düzdür, siyasi cəhətdən rusları dəstəkləməsəm də, düşünürəm ki, idmanın onların siyasətinə heç bir aidiyyatı yoxdur. Ukraynalıları bu məsələdə başa düşmək olar. Onlar təbii ki, rusların yarışlara buraxılmasını istəməyəcəklər. Siyasətdə Ukraynanı dəstəkləsək də, idmanın bu məsələyə aid edilməsinin əleyhinəyəm. İndi yarış daha səviyyəli olacaq".

Eldəniz Əzizli bildirib ki, rusiyalıların yarışması onların özlərinin də doğrudan da öz çəkilərində güclü olub-olmadıqlarını müəyyənləşdirməyə kömək edəcək:

"Mənim 1-2 səviyyəli rusiyalı rəqibim var. İnşallah, kim güclü olarsa, o da qalib gələcək. Mənim üçün xoşdur ki, çəki dərəcəmdə güclü idmançılar yarışsın. Onda özümün bilməyim üçün daha yaxşı olur ki, mən dünyanın ən güclüsüyəm".

Səbuhi Musa