Bu gün minifutbol üzrə Azərbaycan millisi Bakıda keçirilən dünya çempionatının qalibi olub.

Prosport.Az xəbər verir ki, matçdan sonra Azərbaycan Minifutbol Federasiyasının prezidenti Orxan Məmmədov jurnalistlərin suallarını cavablandırıb:

– Bu, tarixi bir hadisədir. Hər bir azarkeşə təşəkkürümü bildirirəm. Azərbaycan Respublikasının Prezidentinə bizə göstərdikləri dəstək üçün minnətdarlığımı bildirirəm. Dövlətin bizə dəstəyin olmasaydı, biz bu qələbəni qazana bilməzdik. Futbolçularımız yüksək səviyyədə və səhvsiz çıxış etdi. Ona görə də bu oyun bizi daha da yüksək yerlərə çatacağımızı göstərir. Bu qələbənin öz azarkeşlərimiz qarşısında baş verməyi bizi daha da çox qürurlandırır. 

– Artıq ABŞ səfirliyi də öz sosial şəbəkəsindən millimizi təbrik edib. Bu məqam bizim qələbəmizin nə dərəcədə böyük olduğunu göstərirmi?
– Əlbəttə, bizim qələbəmiz çox böyük bir hadisədir. Bu danılmaz bir faktdır. Biz hələ Avropa çempionu olanda cənab Prezidentimiz bizi qəbul etməklə qələbəmizin nə dərəcədə əhəmiyyətli olduğunu göstərmişdi. Bizə həmin çempionluqdan sonra maliyyə dəstəyi də ayrılmışdı. Deyə bilərik ki, bu dəstək bizim hazırda dünya çempionu olmağımızda böyük pay sahibidir. Bu, dünya çempionatıdır. Burda zəif komanda yoxdur. 32 yığma arasından ilk pillədə olmağımız qürurlandırıcıdır. Kim bizim qələbəmizi kiçiltmək istəyirsə, onları bizim ölkəmizin düşmənləri də adlandırmaq olar.

– Siz dünya çempionu olmaqla artıq qarşınıza qoyduğunuz əsas məqsədə çatmısızınızmı? Yoxsa, yeni hədəflər varmı?
– Biz cavan federasiyayıq. Ona görə də hədəflərimiz çoxdur. Minifutbolun başqa səviyyəyə çatdırılması, infrastrukturun daha da inkişaf etdirilməsi əsas hədəflərimizdən biridir. Gənclərin də minifutbola daha çox maraq göstərməsi məqsədlərimiz sırasına daxil edilə bilər. 

– Necə düşünürsüz, bu cür təşkilatçılıqdan sonra FIFA da minifutbolu qəbul edəcəkmi?
– Əlbəttə, biz çalışacağıq ki, FIFA rəsmiləri də bu təşkilatçılığı görsün. Dünya Minifutbol Federasiyası ilə birlikdə bu məsələyə baxılır.