Çimərlik futbolu üzrə millimiz Avroliqanın I seçmə mərhələsində (Euro Beach Soccer League) B divizionunun A qrupunu 2-ci yerdə tamamlayıb.

Prosport.Az xəbər verir ki, oynayan məşqçi Sahib Məmmədovun yetirmələri son turda qrup lideri Litva ilə qarşılaşıb.

İspaniyanın El Puerto de Santa Mariya şəhərində keçirilən oyunun əsas vaxtı 2:2 başa çatıb. Əlavə vaxtda isə Litva 4:3 hesabı ilə qalib gəlib. Komandamızdan hər 3 qolu Orxan Məmmədov rəqib qapısından keçirib.

Həmçinin, qrupun digər görüşündə Belçika millisi İngiltərəyə penaltilərdə 4:1 (əsas və əlavə vaxt 2:2 başa çatıb) qalib gəlib. Bununla da Litva və Azərbaycanın ardından Belçika da sentyabrda İtaliyada keçiriləcək Superfinalda oynamaq hüququ əldə edib.

Qeyd edək ki, Superfinalda 6 komanda mübarizə aparacaq. Finala çıxan 2 komanda A divizionuna vəsiqə qazanacaq.