Azərbaycanın minifutbol millisi dünya çempionatında ilk qələbəsini qazanıb.

Prosport.Az xəbər verir ki, A qrupunda yer alan yığmamız Milli Gimnastika Arenasında Sloveniya ilə qarşılaşıb.

Görüş Elşad Quliyevin rəhbərlik etdiyi kollektivin 4:0 hesablı qələbəsi ilə yekunlaşıb.

Millinin heyətində Elvin Əlizadə (10), Mirmehdi Rzayev (11), Xətai Bağırov (25) və Kamran Abdullazadə (40) dəqiq zərbə müəllifi olub.

Qrupun digər görüşündə Mavritaniya Bəhreynə 2:0 qalib gəlib.

Qeyd edək ki, Azərbaycan qrupdakı ilk matçında Bəhreynlə, Sloveniya isə Mavritaniya ilə 1:1 hesablı heç-heçəyə razılaşmışdı. Artıq millimiz 4 xalla qrup lideridir. Mayın 25-də eyni xala malik Mavritaniya ilə qrup liderliyi uğrunda vacib görüş olacaq.