"Maraqlı oyun alındı. Çoxdandır ki, bu cür atmosferdə, belə şəraitdə oyun oynamamışdıq. Sadəcə ağır idi. Çünki öz formamızdan uzaq idik. Hər bir halda, bir xeyli futbolçunun ustalığını gördük. Çoxdandır görmədiyim futbolçuları da gördüm. Onlarla görüşdük, xeyli zarafatlar etdik, keçmişi yada saldıq. Məncə, hamı üçün maraqlı oyun oldu".

Prosport.Az xəbər verir ki, bunu "Qarabağ"ın baş məşqçisi Qurban Qurbanov deyib. O, "Premyer Liqa məşqçiləri" və "Neftçi 2000-lər" arasında keçirilən oyundan danışıb.

Qurban Qurbanov "Neftçi 2000-lər"in heyətində də oynamaq istəyindən söhbət açıb: "Neftçi"nin əfsanələri komandasında da oynamaq istəyərdim. Bəlkə 1 hissə bir, o biri hissə digər komandada oynamaq olardı. Yəqin, sistem elə qurulmuşdu ki, sona qədər belə oynayaq. Nə qədər olmasa, məşqçilərlə birlikdəydik, bəlkə daha uyğunu bu idi. Amma fərqi nədir? Burada hamımız Orxan Məmmədova və onun keçirdiyi turnirə dəstək olmaq üçün gəlmişdik. Hər şey gözəl və super alındı".

Qeyd edək ki, Qurban Qurbanov penaltilər seriyasında Hüseyn Məhəmmədov səddini keçə bilməyib.