Sabiq müdafiə sənayesi naziri, Təhlükəsizlik Şurası katibinin müavini, Milli Qəhrəman, general-polkovnik Mədət Quliyevin istefasından sonra Azərbaycan Velosiped Federasiyasının prezidenti postuna seçkilər keçiriləcək.

Prosport.Az-ın əldə etdiyi məlumata görə, federasiyanın Hesabat-Seçki Konfransı Gənclər və İdman Nazirliyinin inzibati binasında mayın əvvəllərində baş tutacaq.

Artıq həmin posta namizəd də bəllidir. Adı müəyyənləşdirə bilməsək də, həmin şəxsin hansısa nazir və ya dövlət agentliyinin İdarə Heyətinin sədri olmayacağı dəqiqdir. Yeni federasiya prezidentinin gəlişindən sonra baş katib postunda da dəyişiklik olunacağı gözlənilir.

Qeyd edək ki, M.Quliyevin istefası Təhlükəsizlik Şurası katibinin müavini vəzifəsindəki işlərinin spesifikliyi ilə əlaqələndirilsə də, onun istefası federasiyaya nazir postundan ayrıldıqdan (18 noyabr 2023-cü il) sonra maddi baxımdan pul ayıra bilməməsi ilə bağlıdır. O çoxdan idi ki, bu postdan ayrılmaq üçün yerinə namizəd axtarırdı. Artıq həmin namizəd tapıldığından, M.Quliyev istefa verib.

Xatırladaq ki, Mədət Quliyev 2021-ci ilin noyabrın 26-da sabiq vergilər naziri Fazil Məmmədovdan boş qalan posta seçilmişdi.