"Şəki" komandası Azərbaycan Basketbol Liqasının pley-off (1/4 final) mərhələsinin ilk oyununda qələbə qazanıb.

Prosport.Az xəbər verir ki, bölgə klubu evdə "Gəncə"ni məğlub edib. 

Qarşılaşma ötən dəfə Şəkidəki "Gəncə" ilə matçda olduğu kimi, overtayma gedib – 79:79. 5 dəqiqəlik əlavə vaxtda isə "Şəki" 85:84 hesabı ilə qalib gəlib. Bununla da tərəflərin 5-ci duelində "Şəki" öz meydanında bu rəqibini 3-cü dəfə məğlub edib.

Qeyd edək ki, tərəflər arasında cavab matçı aprelin 20-də Gəncə İdman Sarayında baş tutacaq. "Şəki" qalib gəlsə, yarımfinalda "Sabah" – "Sərhədçi" cütünün qalibi ilə qarşılaşacaq. "Gəncə" qalib gəlsə, tərəflər arasında 3-cü – həlledici qarşılaşma yenidən Şəki Olimpiya İdman Kompleksində keçiriləcək.